Als de Flutsch noch fuhr

Von Ernst Schmitz

Wie ich des Daag över de Geisweed geng on soch dä schöne neue Parkplatz, on dä Betrieb met all dä Autos an dem Spektakel, do feele mie die Zidde für ca. 40 bis 50 Johr en, wie ich op de Geisweed jong woe. Do stond an dä Stell os jood ahl Flutsch, wie mie et Kreisbähnche nenne däte.

Dat woe e Paradies für os Pänz, he konnte mie spelle. Die einzige Fuhrwerke woren Kaare, die op de Geisweed Klütte lade kohme, Metzgere, die met Päed on Wage nohm Schlachtes fuhre, e Deel kohm e sugar met Wägelche, füe die se ne Hongk gespannt hatte. On wann sooche mir dann ens e Auto? Jo, et jov e su en Dönge, äve wo on wann?

Mie kannte die Päed en de Kaare, mie wosste, wem se gehuete, die Kutschere wore os net fremb, mie wosste och, wem die kleen Waggons woere on wä se uslaade kohm.

Jeede Dag, bei Wöng on Wödde stond et Kollemarie met senge Klüttejavvel, grueß, wie en Trottewasch-Plaat, on maat net nue eene Waggon ledig am Daag. Et woe e Fraumensch, grueß on knackig on stärk, wie e Päed. Et sproch wennig, seng Ärme genge, wie en Maschin, ohn Ongerbrechung. Et Kollemarie hat ens bessere Daag gesehn, jede wooß et on leht et en Rauh. Wemmer höck enem su en Ärbeet anbeede däht, on dann füe die paar Grosche am Daag, dä heelt ene füe jeck. Et konnt äber och schenge, wie ne Türk, on dann woere mie Männ et jewöhnlich schold, wat kannte mie von dä Tragik em Kollemarie sengem erbärmliche Lävve. Gott trües et en de Iwigkeet.


Die Jungfernfahrt der „Flutsch“ im Jahre 1895, Bahnhof Mülheim-Wichterich

Wat woe dat manchmol ene gemütliche Betrieb met dem Bähnche. Wenn morgens die Wiever met Eier, Speck, Botter on Gemös von dä ömliegende Dörper op de Maat kahme, oder jenge damet bei ihr Kundschaff en de Stadt, dann kannte mie se all, genau, wie mie och wosste, wä an de Flutsch „om Stationsgebäude'“ Deens hat, Güterraum, Deensraum, Wartezimmer, all dat woe e su grueß, wie e grueß Wohnzimmer. Ich weeß noch joot, wie eines Daags ne Automat do kohm, us dem konnt me, wämer ne Jrosche hat, Schokolad trecke, äver we hat von os Pänz ene Jrosche. Domols wued net mem Jeld esu erömjeaas wie höck.

Wenn meddags die Flutsch wedde fuhr, dann kohm dat op e paar Minutte net ahn. Lez frog dä Zugführer, ob seng Stammkundschaff och do woe, on wenn ene sät, et Jriet fählt noch, dann wued eben jewaat, bes dat et Jriet do woe. Dann schold dä Maschinis on sät: „Et näkstenmol wied äver ne mie gewaat, mie losse net von dir ose Fahrplan dörchenander bränge!“ Oder, wenn en von dä Wiever bei dä Ankunf sät: „Ich moss witt en de Stadt, wenn ich net janz pünklich sen kann, dann waat e besje“, wat dann och gedohn wued. En dä Personewage woe ene Offe, dä wued met Klütte gestauch. Ahnstauche dät de Zogführer, äver növve jedem Offe loge e paar Klütte. Wer dann zeiesch do woe, däht widde stauche on worep e paar Klütte drop. Die Beleuchtung woe Karbidgas, onge jedem Weggon heng ene Kaste, en däm woe en Blechkess, du woe Wasser dren. Befür nue dä Zog fuhr, schmess dä Schaffner e paar Knubbele Karbid en das Wasser on dann konnt hä em Wage de Lamp ahnmaache.

Manchmol brannt et äver och net, dann hatte gewöhnlich mie Pänz dä Karbid us dem Kaste gehollt, denn dä konnte mie jo och bruche. Wä äver dobei geschnapp wued, kreg ene Baleg Wachs, dä net von schlechte Äldere woe, deheem wued allerdings dovon nüs gesaat, sönst jov et noch eenmol Klatsche. Och dat woe domols andesch als höck.

Wie mie en de Scholl kohme, fuhr die Flutsch noch dörch Feld on Flur. Wo höck die Nordstadt steht, do jov domols noch vell Weed, Wees, Äeppel, Koen on Gemös. Dann fuhre mie manchmol op dä letzte Puffere bes ahn et Kleenefeldche on spronge do av, wenn os net fürher ene von dä Schaffnere eravgeklatsch hat.

On do hammer os geräch, denn obwohl mie os met dä Bahnmänn jot verdroge, ne kleene Kreg jov et doch emme.

Beem Vonderwalde op de Neustroß jov et füe 2 Penning e Dösje Pölevje, dat woren kleen rut Plättche wie en Lens grueß, do woe en winzig Meng Poleve dren, wemmer do mem Fuß dorp troht, dät et knalle. Von dä Blättche hatte mie alle fönef Meter e janz Deel op de Schenne jelaat. Ob wie nu endlich die Flutsch suvell Odem hatt, dat se leef, do feng et op emol ahn zu knalle. Em Rupp däht die Flutsch hahle, die Schaffnere erus on ruck-zuck hatten se os beem Weckel, denn dommerwies stonde mie net witt davon on wollten ens sehn, wie dat usjeng. Et Engk vom Leed woe, daß jede Jong, dä do eröm stand, och wenn hä nüs mem däm Attentat ze dohn hat, at wedde Schrüpp kräg.

Su hatte mie emme jet Kleinkrieg.

Äver mie woren doch met dä Bahnemänn fröngk, mie holepen dänne de Waggons rangiere on dann mot alles däue helepe on wenn ens en Weich falsch gestellt woe, nu, dann jeng evens dä Waggons ens nevve de Schenne, wat woe do schon dobei.

Ich sehn se höck noch für mie, die ahl Beamte, die für e paar Jrosche bei Wöngk on Wedde ihre Deens maate, de ahl Schäfer, de Brenner, dä os emme die Schrüpp jov, de Loose met sengem Schnäuzer, dä esu brölle konnt, de Fassbender on andere.

Wenn noch eene von dä ahl Häere levve sollt, dann wied hä mie wohl net kott sein, dat ich die Name nenne, se sen bei os all en jooder Erinnerung. Et woe für os Pänz en herrliche Zitt.

Eines Daags hatte mie gesehn, wie dä ahl Schäfer senge Bahnhoff zomaht on en die Stadt jeng. Dat woe für os Pänz die richtige Gelegenheit, an dä Waggons erömzespelle, on weil Pänz op de unmöglichste Idee komme, spellte mie Ihsebahn-Onglöck. Eene laht sich zweschen de Schenne, on 2 andere dauhten dä Waggon över dä. Gott sei Dank es jo nüs passiert, wemmer dovon absitt, dat ich, jrad wie in onge däm Waggon loch, net jesehn hat, dat dä Bahnbeamte zeröckkomme woe on von dem, eh dat ich loofe konnt john, beem Weckel geschnapp wue on ene Baleg Wachs kräg, wie ich et däm joode Schäfer nie zogetraut hat. On wie hä dat och noch mengem Vatter verzallt, gov et noch ens Schrüp, dat ich de Engelche flöte huet.

On weil die ahl, jood Gansweed met esu vell Jugend-Erinerunge verknüpf es, deshalb deht et mie esu leed, dat die ärm Pänz keen Flutsch mie han, die met sich spelle lätt.

Et es eben höck alles andesch, op et schöner es, muss sich jede selvs sage konne.

Entnommen: Heimatkalender des Kreises Euskirchen 1964

© Copyright 2003 Kreisarchiv - Der Landrat
©
Copyright wisoveg.de 2003
Zu den Euskirchener Wisoveg-Seiten
Zur Homepage